“Flamenqu”nun “Qarabağ”dan transfer etdiyi Juninyunun performansı Braziliyada birmənalı qarşılanmır.

Prosport.Az xəbər verir ki, azarkeşlər 28 yaşlı hücumçunun çıxışından narazıdır. Onlar “Flamenqu”ya keçdikdən qısa müddət sonra zədələnən və yenicə yaşıl meydanlara dönən forvarddan qollar gözləyir.

Braziliyalı futbol mütəxəssisi Mauro Sezar isə futbolçuya inandığını açıqlayıb. O, azarkeşlərdən Juninyuya bir qədər vaxt vermələrini istəyib: “Bir az sakit olmaq lazımdır, çünki Juninyu Azərbaycandan yeni gəlib. Ona vaxt lazımdır. Üstəlik, burada keçirdiyi oyun sayı da hələ azdır. Yeni kollektivə uyğunlaşa və bacarıqlı olub-olmadığını göstərə bilər”.

Qeyd edək ki, Juninyu “Qarabağ”dan “Flamenqu”ya bu ilin əvvəlində 5 milyon avroya transfer olunub. Forvard geridə qalan müddətdə Braziliya klubunun heyətində cəmi 1 qol vura bilib.