Azərbaycan Premyer Liqasının XXVI turunda  baş tutan “Araz-Naxçıvan” – “Qarabağ” (1:3) matçından sonra meydan sahibi komandanın baş məşqçisi Elmar Baxşıyev jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə oyunla bağlı fikirlərini bölüşüb.

– Maraqlı oyuna şahid olduq. Dinamik oyun keçdi. Kubok oyunlarına görə 4 gündən bir oynayırdıq. Buna görə də sıxıntımız var idi. Futbolçularıma təşəkkür edirəm ki, həmin sıxıntını bizə oyunda göstərmədilər. Yaxşı komandaya məğlub olduq. Bunu unudub, növbəti matçlara hazırlaşacağıq.

– Meydanda baş verən hadisədən belə çıxdı ki, yeganə günahkar Felipe Santosdur. Amma təkrara baxdıqda Elvin Cəfərquliyevin Santosu boğduğu və daha bir sıra məqamlar göründü. Hakimin qərarı haqda nə düşünürsünüz?
– Mən həmişə gördüyümü deməyə çalışmışam və nəyi də görmüşəm, onu deyirəm. Heç kimdən də çəkinmirəm. Bəzən, sizin həmkarlar mənim dediklərimi başqa yerə yozurlar ki, Elmar deyinir. Bir az etikadan kənara çıxıram, amma həqiqəti olduğu kimi göstərmək lazımdır. Neçə oyundur, bu baş verir. Limitdə olan oyunçulara çox rahat şəkildə “sarı” verirlər. Bu, uzun mövzudur. Ümid edirəm ki, komanda olaraq belə çətinlikləri adlayacağıq. Mənə də təəccüblü gəldi ki, 20 nəfər komanda şəklində mübahisə edir. Amma bir nəfəri günahkar çıxartmaq acizlikdir. Yenə də fikirləşirlər ki, Santosu sındırmaqla bizə təsir edəcəklər, əfsuslar olsun.

– Qara Qarayevin durumu nə yerdədir?
– Mikro zədədir. Neçə oyun idi ki, 90 dəqiqə oynayırdı. Ehtiyat edib, onu əvəzlədik.

– Sındırmaq deyirsiniz. Bəs bunun kökündə nə dayanır?
– Bunun nədən qaynaqlanması mənə aid məsələ deyil. Amma görünən odur ki, verdikləri qərarlarla təsir edirlər. Sabah başqa cür yozacaqlar. Möhkəm olmalı və işimizə davam etməliyik. Məncə, komandam layiqli cavab verəcək.

– Komandaya niyə təsir edirlər? Bəlkə bildiyiniz səbəblər var?
– Mənim işim komandamı analiz etmək, onları məşqə hazırlamaqdır. Detallara girsəm, komandamı unudacağam. Sizləri oyun sonrası belə görmək mənim üçün xoşdur. Gedin, təkrara baxın, görün, İqor Ribeyro ilə Vanderson Meloya necə “sarı” veriblər. Vallah, özünüz hər şeyə optimal yanaşacaqsınız.

– Sizcə, hədəf “Araz-Naxçıvan”dır, yoxsa Elmar Baxşıyev? Ola bilərmi ki, “Araz-Naxçıvan” ilk “4-lük”də hansısa komandanın yerini tutur?
– Əgər məni seçiblərsə… Mən məşqçiyəm, məşqçiylə mübarizə aparmazlar. Yenə deyirəm, möhkəm olmaq lazımdır. Bu sıxıntılar gözlənən idi. Heyətdə də itkilər var. Düzgün analiz edib, qarşıdakı oyunlara hazırlaşacağıq.

– Ötən mövsüm siz “Qəbələ”də olarkən də belə sıxıntılar var idi. Sizcə, hansı klubdakı təzyiq daha çox idi? 
– Vallah, təzyiq altında işləməyə öyrəşmişəm. Mənim üçün yeni deyil. Amma məşqçinin əlinin altında 5-6 futbolçu olmayacaqsa, sıxıntı yaşayacağıq. Çempionat hələ bitməyib. İnanıram ki, komanda şəklində irəliləyəcəyik.