UEFA Avropa Konfrans Liqasında mübarizə aparacaq “Neftçi” transfer bazarında konkret addımlar atıb.

Prosport.Az "sportinfo"ya istinadən xəbər verir ki, paytaxt təmsilçisi 4 yeni sima ilə anlaşıb.

Anlaşılan oyunçulardan 2-nin kimliyi məlumdur. Ağ-qaralar Fil Dişi Sahilindən olan Ervin Koffini və sloveniyalı Mixa Blajiçin keçidini həll edib.

Afrikalı legionerlə 2+1 illik müqavilə imzalanıb. Fransa doğumlu futbolçu Fil Dişi Sahilinin U-23 yığmasının formasını 1 dəfə geyinib. "Şarlerua"nın yetirməsi son olaraq Fransada "Pau"nun formasını geyinib. 28 yaşlı futbolçu bunadək 2015-2018-ci illərdə "Loryan"ın şərəfini qoruyub və daha sonra Kiprdə ("Anortosis" və "Olimpiakos") legioner həyatı yaşayıb. Sağ cinah müdafiəçisi olan Koffi əvvəl dayaq yarımmüdafiəçisi və mərkəz yarımmüdafiəçisi kimi də oynayıb.

30 yaşlı Mixa Blajiç də Fransa bazarına məxsus futbolçu sayılır. Sloveniyalı mərkəz müdafiəçisi ölkəsində "Koper" və "Domjale"dən sonra Macarıstanda "Ferentsvaroş"da legioner həyatı yaşayıb. Onun son klubu Fransanın "Anje" klubu olub. O, ötən il Liqa 1 klubu ilə 3 illik müqavilə bağlasa da, komandası elitadan düşüb. Blajiç Sloveniya millisinin üzvüdür.