Bir neçə gündür sosial şəbəkələrdə “Qarabağ”ın müdafiəçisi Elvin Cəfərquliyevin müxtəlif klublardan təklif aldığı barədə xəbərlər yayılıb.

Prosport.Az xəbər verir ki, İtaliyanın məşhur klublarından “Torino”, A Seriyasının digər komandası “Komo”, Polşanın “Lex” (Poznan) və Macarıstanın “Ferensvaroş” klublarının Azərbaycan yığmasının üzvü üçün hərəkətə keçdiyi bildirilir.

Lakin maraqlıdır ki, “Qarabağ” rəsmiləri bu xəbərləri açıqlamalarında təkzib edib. Onlar Cəfərquliyev üçün heç bir rəsmi təklif almadıqlarını bildirib. Buna baxmyaraq, sosial şəbəkələrdə bu mövzu səngimək bilmir.

Futbolinfo.az adıçəkilən klublara “Sizin Azərbaycan yığmasının üzvü Elvin Cəfərquliyevi transfer etmək istədiyiniz barədə xəbərlər var. Bu futbolçu ilə maraqlanmısınız və ya onu tanıyırsınız” sualını ünvanlayıb.

“Komo” klubunun idman direktoru Karlalberto Ludi cavabında futbolçunu tanımadığını bildirdi: “Xeyr, üzr istəyirəm, amma mən bu futbolçunu tanımıram”.

“Lex”in mətbuat xidmətinin rəhbəri Matsey Henj isə futbolçunu tanısa da, transfer barədə xəbəri təkzib etdi: “Əlbəttə ki, Elvin Cəfərquliyevi tanıyıram. Çünki biz “Qarabağ”a qarşı oynamışıq və o da heyətdə olub. Amma azərbaycanlı müdafiəçini transfer edəcəyimiz xəbərləri doğru deyil”.

“Torino” klubunun idman direktoru Davide Vanyati də Elvini tanımadıqlarını açıqladı: “Xeyr, onu tanımıram və maraqlanmamışıq”.

“Ferensvaroş” klubundan isə suala ümumiyyətlə cavab vermədilər.

Elvin Cəfərquliyev hazırda Azərbaycanın ən yaxşı oyunçularından biri olsa da, bu cür xəbərlərin yayılması onun karyerasına zərər vura bilər. Amma müdafiəçiyə marağın olduğu dəqiqdir. Yəqin ki, yayda Cəfərquliyevin transferi ilə bağlı daha çox xəbər eşidəcəyik.