Polşada keçirilən III Avropa Oyunlarında son 2 gündə Azərbaycan idmançılarının medal qazana bilməməsi ölkəmizin medal sıralamasında 11 pillə geriləməsinə səbəb olub.

Prosport.Az xəbər verir ki, atıcılar, taekvondoçular və qılıncoynadanların medal qazana bilməməsi nəticəsində ölkə 2 qızıl, 1 gümüş və 2 bürünc medalla ümumi sıralamada 21-ci sıraya enib.

İlk “3-lük”də isə dəyişiklik baş verməyib. Medal əyarına görə sıralamaya əvvəlki tək İspaniya (18 qızıl, 11 gümüş, 10 bürünc) başçılıq edir. İtaliya (17 qızıl, 17 gümüş, 21 bürünc) 2-ci pillədəki yerini qoruyub. Ukrayna isə (11 qızıl, 7 gümüş, 4 bürünc) 3-cü yerdə qalıb.

İndiyədək ümumilikdə 39 ölkə medal qazana bilib.

Qeyd edək ki, Azərbaycan yığması medallarını 2 növdə – karate (2 qızıl, 1 bürünc) və taekvondoda (1 gümüş, 1 bürünc) əldə edib.