Dünən ASCO Arenada keçirilmiş U-15 Liqasının final matçı olan “Sabah” – “Neftçi” qarşılaşmasında tamaşaçılar futbolda nadir görünən hallara şahidlik edib.

Prosport.Az xəbər verir ki, 54-cü dəqiqədə "Sabah"ın kapitanı İslam Həsənov qol vurub. Maraqlıdır ki, Həsənov yox, onun komanda yoldaşı Ağasəlim Abdullayev sevincini formasını çıxarmaqla qeyd edib. Bu isə onun 2-ci sarı vərəqə alması və meydandan qovulmasına səbəb olub.

Həmçinin, 86-cı dəqiqədə də "Sabah"ın futbolçuları intizamsızlığı ilə seçilib. Emil Məmmədov 3 saniyə ərzində 2 sarı vərəqə alaraq meydandan qovulub. Bununla belə, "Neftçi" oyunu əlavə vaxta aparmaq üçün 9 nəfərlə qalmış rəqibinə lazımi qolu vura bilməyib və "Sabah" 1:0 hesabı ilə qalib gələrək U-15 Liqasının çempionu olub.

3-cü yer uğrunda oyunda isə “Zirə” “Araz Naxçıvan” üzərində 6:0 hesablı qələbə qazanıb. Final qarşılaşmasından sonra mükafatlandırma mərasimi təşkil olunub. İlk 3 yeri tutan komandalara medallar və diplomlar, çempion “Sabah” komandasına isə kubok verilib. Mükafatları AFFA Məşqçilər Komitəsinin üzvü Yaşar Vahabzadə, Kütləvi Futbol Departamentinin rəhbəri Fərrux İsmayılov, U-15, U-16 milli komandalarının baş məşqçisi İlham Yadullayev və Uşaq və Gənclər üzrə Yarışların Təşkili şöbəsinin rəisi Yusif Vəliyev təqdim ediblər.

“Sabah” komandasının üzvü İslam Həsənov 76 qolla liqanın ən məhsuldar oyunçusu olub. “Neftçi” komandasının üzvü Elvin Vəliyev isə AFFA U-15 Liqasının ən yaxşı oyunçusu seçilib və xüsusi hədiyyə ilə mükafatlandırılıb.