“Sumqayıt”ın yeni mövsüm üçün büdcəsi məlum olub. “Kimyaçılar” Premyer Liqada qalmağı bacarsa, 9-10 milyon manatlıq vəsaitə sahib olacaq.

Prosport.Az futbolinfo.az-a istinadən xəbər verir ki, klub hazırda bu məbləğin təxminən yarısı hesabına yaşayır. Bütün klublara illik verilən 3 milyon manat dövlət yardımından əlavə, əsas sponsor olan “Azərikimya” İstehsalat Birliyi də “Sumqayıt”a bu vəsaitin yarısı qədər vəsait ayırır. Kiçik sponsorluq müqavilələri, beynəlxalq futbol qurumlarından müxtəlif layihələr vasitəsi ilə gələn pulları da nəzərə alsaq, Gənclik şəhəri təmsilçisi təxminən 5 milyon manatla mövsümü tamamlayır.

İndi bunun üzərinə daha 4 milyon manat gələcək. Sumqayıtlıların yeni sponsoru olan “SOCAR Polymer” MMC məhz bu qədər maliyyə ayırmağı lazım bilib. Mehdi Hüseynzadə adına şəhər stadionuna, klub bazasına adın verilməsi, həmçinin geyimlərə “SOCAR Polymer” loqosunun vurulmasının qarşılığı belə ödəniləcək.

Lakin ola bilər ki, bu büdcəni idarə etmək menecer-prezident Riad Rəfiyevə qismət olmasın. Yeni sponsorların gəlişi ilə onun postundan azad olunması gündəmdədir. Himayədarlar iddialı komanda qurmaq istəyir və araşdırdıqları Rəfiyevin idarəçiliyi onları qane etmir.