"Bu qələbə bir qapıçının yox, bütün komandanın oyununun nəticəsidir". 

Prosport.Az-ın xəbərinə görə, bunu 17 yaşadək futbol millimizin (U-17) qapıçısı Elbrus Kərimov bildirib.

Belarusun paytaxtı Minskdə keçirilən İnkişaf Kuboku turnirində İran üzərində qazanılan qələbədə (1:0) seyvləri ilə diqqət çəkən qapıçı matçdan sonra təşkilatçılar tərəfindən oyunun ən yaxşısı seçilib.

İspaniyanın "Marset" Akademiyasının üzvü olan, son matça komandanı kapitan kimi meydana çıxaran qapıçı kollektiv şəkildə qələbə qazandıqlarını bildirib: "Komanda kimi birlikdə yaxşı oynadıq. Buna görə də komanda yoldaşlarıma təşəkkürümü bildirirəm. 1-ci və 2-ci oyun arasında vaxt az idi. Ancaq bununla belə, biz bir-birimizə inanaraq oynadıq. Öz ölkəmizi, valideynlərimizi, tanışlarımızı sevindirmək üçün qələbə qazandıq".

Qeyd edək ki, U-17 millimiz B qrupunda 3 xalla 3-cüdür. Rusiya və Qazaxıstan 4 xalla müvafiq olaraq 1-2-cidir. İran xal toplaya bilməyib. İlham Yadullayevin yetirmələri sabah qrupdan lider çıxmaq üçün Qazaxıstanı yenməyə çalışacaq.