"Kəpəz" Misli Premyer Liqasının XXIII turunda Tovuz şəhər stadionunda "Şamaxı" ilə 1:1 hesablı heç-heçə edib.

Prosport.Az xəbər verir ki, Gəncə təmsilçisinin baş məşqçisi Azər Bağırov oyundan sonra keçirilən mətbuat konfransında jurnalistlərin suallarını cavablandırıb:

"Maraqlı oyun alındı. 2 fərqli hissə izlədik. Məncə, ilk yarıda daha yaxşı oynadıq. 2-ci hissədə həm orta xətdə, həm də cinahlarda "dişsiz" olduq. Sevindirici haldır ki, 3 turdur məğlub olmuruq, xallar qazanırıq".

– Oyundan sonra çox əsəbi görünürdünüz. Aqressiyanız hakimlərə idi?
– Hakimlərə deyildi, öz futbolçularıma idi. Evdə qazanılan xallar çox vacibdir. Bu gün qələbə qazansaydıq, "Zirə" ilə matça fərqli motivasiya ilə çıxa bilərdik.

– Matçdan əvvəl desəydilər ki, bu gün heç-heçə olacaq, inanardınız?
– Maraqlı sualdır. Amma hər məşqçi meydana qələbə üçün çıxır. Həddindən artıq qələbə istəyirdik.

– Müdafiənin mərkəzində problem hiss olunur?
– Cavan futbolçumuz Nemət Musayev var. Amma onu birdən-birə meydana atmaq istəmədik. Hələ qarşıda 13 tur var. Növbəti oyunlarda meydanda ola bilər. Mahamadu Ba da o mövqedə yaxşı oynadı. Orta xətt oyunçusunun orada oynaması problem deyil.

– Əlinizdə olan heyətin potensialı bundan da artığına qadirdir?
– Günü-gündən daha yaxşı olmağa çalışırıq. Səhvlərin sayını azaltsan, daha sadə, səhvsiz oynasan, xallar qazanacaqsan. Futbolçulardan əsas tələbimiz odur ki, az səhv etsinlər. Çatışmazlıqlarımız çoxdur.

– Fasilədə hücum xətinin 2 oyunçusunu əvəzləməyinizin səbəbi nə idi?
– Daha çox cinahlarda oyun qurmaq istədik. Bəzi epizodlarda bu alınmadı. Səhv başqa yerdə idi. Mərkəz oyunçuları onları istədiyimiz ötürmələrlə təmin etmədi. Camal Cəfərov və Trent Buhaqiar sürətli futbolçulardır. Onların sürətindən yararlanmaq istəyirdik.