"Şamaxı" Misli Premyer Liqasının XXIII turunda səfərdə "Kəpəz"lə 1:1 hesablı heç-heçə edib.

Prosport.Az xəbər verir ki, qonaqların baş məşqçisi Ayxan Abbasov matçdan sonra keçirilən mətbuat konfransında jurnalistlərin suallarını cavablandırıb:

– Stresli oyun idi. "Kəpəz" də, biz də məğlub olmaq istəmirdik. Hər iki komandanın xala ehtiyacı var idi. Oyunun gərginliyi futbolçularda da hiss olunurdu. Hər iki hissədə qol fürsətlərindən yararlana bilmədik. Kobud səhvdən qol buraxdıq. İstənilən halda xalımızın üstünə xal gəldi. Yolumuza davam edirik. Futbolçularımı təbrik edirəm.

– Sanki hər iki komanda heç-heçədən məmnun idi. Siz necə düşünürsünüz?
– Oyunun axarı gərgin keçirdi. Deməzdim ki, rəqibə 100%-li epizod verdik. Üstünlük bizdə idi. Amma oyunun ssenarisinə görə 2 komanda da 1 xala layiq idi.

– Bu gün Belaydi Pusi ilə Leroy Mikelsin yoxluğu hiss olunurdu?
– Bu gün 3 itkimiz var idi. Vasiliye Bakiç də isinmə hərəkətləri zamanı zədələndi. Mikels və Pusi önəmli oyunçularımızdır. Amma mən elə yanaşmıram. Hamıya güvənirəm. Gənc futbolçular özlərini meydanda rahat hiss edir. Bu məni sevindirir.

– Leroy Mikels nə vaxt yaşıl meydanlara qayıdacaq?
– Zədəsi ciddidir. Amma, inşallah 1 həftə sonra məşqlərə başlayacaq. XXV turda oynamaq ehtimalı çoxdur.