"İlk hissədə taktiki planda bəzi səhvlərimiz oldu. Çətin, amma vacib qələbə idi. Futbolçularımı təbrik edirəm".

Prosport.Az xəbər verir ki, bu sözləri "Turan Tovuz"un baş məşqçisi Qurban Berdiyev doğma meydanda "Araz-Naxçıvan"a 1:0 hesabı ilə qalib gəldikləri Misli Premyer Liqasının XXIII tur oyunundan sonra keçirilmiş mətbuat konfransında deyib.

Rusiyalı mütəxəssis jurnalistlərin suallarını da cavablandırıb.

– Roderik Miller və Şəhriyar Əliyevin yoxluğu komandanın nəticələrinə təsir edir?
– Xeyr, belə deməzdim. Denis Marandiçi də əlavə etmək lazımdır. Amma hər zaman belə olur ki, komandaya yeni gələnlərin adaptasiya olması müəyyən vaxt alır. Oyunda müəyyən dəyişikliklər olur. Sistemi tətbiq etmək üçün vaxt lazım gəlir.

– Kristian Da Silvanın start heyətində olmaması limitlə bağlıdır?
– Bəli. O, yaxşı vəziyyətdədir, amma limit amili var.

– Sol cinahda Rüfət Əhmədovun yox, İsmayıl Zülfüqarlının oynamasının səbəbi nədir?
– Planlaşdırmışdıq ki, Rüfəti 2-ci hissədə meydana buraxaq. İlk yarıda İsmayıldan aktivlik gözləyirdik. Amma o istədiyimiz aktivliyi göstərə bilmədi.

– Rəqib futbolçuya verilən qırmızı vərəqə ilə bağlı fikirləriniz necədir?
– Bildiyiniz kimi, hakimliklə bağlı sualları cavablandırmaq istəmirəm. Belə yanaşsaq, bundan əvvəlki oyunlarda da bizim əleyhimizə qərarlar olmuşdu.