"O vaxt biz səfərlərə indiki kimi çarter reyslə getmirdik". 

Bunu Prosport.Az-a millimizin sabiq futbolçusu Arif Əsədov deyib.

Millimizin o dövrlərdə çalışmış tibb personalının üzvü, massajçısı Faiq Hüseynov (videonu məhz o çəkib – red.) bugünlərdə 90-cı illərdə olan millimizin düşərgəsindən çəkilmiş videoları paylaşır. Bunlardan 1996-cı ilin mayın 31-də millimizin Fransada keçiriləcək dünya çempionatının seçmə mərhələ oyunu zamanı Norveçin paytaxtı Osloda olması ilə bağlı video diqqəti çəkib. Belə ki, komandamız rəqib komandanı yemək-yeyə analiz edib.

Həmin vaxt "Neftçi"nin müdafiəçisi olmuş 54 yaşlı Arif Əsədov bunu baş məşqçi Kazbek Tuayevin qərarı ilə belə etdiklərini bildirib: "Səfərlər zamanı vaxtımız hava limanlarında keçirdi. Bir ölkəyə getmək üçün 2-3 təyyarədən istifadə edirdik. Ümumiyyətlə, oyuna kimi maksumum 1-1,5 gün vaxtımız olurdu. Həmin görüntülər çəkilən zaman biz Norveçə yeni çatmışdıq. Dedilər ki, əşyalarınızı otağa qoyub, tez axşam yeməyinə düşün. Bakı ilə arada saat fərqi də vardı. Yatma vaxtına az qalmışdı. Vaxt az olduğundan, Kazbek Tuayev elə etmişdi ki, yemək yeyə-yeyə Norveçin oyununa baxaq. Televizor da gördüyünüz kimi köhnədir. Analiz o vaxt 40-45 dəqiqə çəkirdi. İndi müasir texnologiya ilə bu, 20-25 dəqiqə olur. Orada göründüyü kimi, yorğun görünürük. Uzaq səfər yolçuluğu, saat fərqi, yuxusuzluq bizi yormuşdu".

Qeyd edək ki, 2 gün sonra iyunun 2-də komandamız "Üleval" stadionunda 14 012 tamaşaçının gözü önündə güclü rəqibinə 0:5 hesabı ilə məğlub olur. Şimali irlandiyalı hakim Alan Snodinin idarə etdiyi görüşdə Stole Sulbakken (8, 46) və Ule Qünnar Sulşar (37, 90) dubl edir. 1 qolu isə Frank Strandli rusiyalı legionerimiz Aleksandr Jidkovun qapısından keçirir. Bu görüşdə həmçinin "Mançester Siti"nin hücumçusu Arlin Holanın atası, o vaxt "Notinqem Forest"də çıxış edən Alfi Holan da sağ cinah müdafiəçisi kimi 90 dəqiqə meydanda oynayıb.

Səbuhi Musa