“Qarabağ”dan ayrılan Rişard Almeyda klubla vidalaşmasının gözlənilməz qərar olmadığını bildirib.

Prosport.Az xəbər verir ki, 35 yaşlı yarımmüdafiəçi jurnalistlərə açıqlamasında uzun müddətdir bu addımı atmağı düşündüyünü deyib.

Dünən müqaviləsinə xitam verilən brazilyalı qərarını bu cür izah edib: "Gedişim ani olmadı. Artıq neçə vaxtdır ki, belə bir plan düşünürdüm. Bəzən həyatda elə anlar gəlir ki, qərar verməli olursan. Hamı “Qarabağ”a və Qurban Qurbanova olan sevgimi bilir. Həyat yoldaşımla düşündük və qərara gəldik ki, Braziliyaya qayıdaq. Həyatımızda yeni bir səhifə açmaq istəyirik”.

Braziliyalı futbolçu gənc yaşlarında vətənini tərk etdiyini və karyerasının böyük hissəsini xaricdə keçirdiyini xatırladıb: “Mən çox gənc yaşlarımdan Braziliyanı tərk etmişəm. Orada cəmi 4 oyun keçirdikdən sonra uzun müddət Portuqaliyada və Azərbaycanda çıxış etmişəm. Artıq Braziliyadan təklif də var. Ona görə qərara gəldim ki, gedib öz vətənimdə də futbolun dadına baxım. Bəlkə bir gün qismət olarsa, Azərbaycana məşqçi kimi qayıdaram”.