"Səbail" Misli Premyer Liqasının XXII turunda səfərdə "Qarabağ"a 0:5 hesabı ilə məğlub olub.

Prosport.Az xəbər verir ki, "dənizçilər"in baş məşqçisi Cavid Hüseynov oyundan sonra keçirilən mətbuat konfransında jurnalistlərin suallarını cavablandırıb.

– 2 dəfə dalbadal "Qarabağ"la qarşılaşdıq. 3 gün sonra bu rəqibə qarşı oynamaq bizim kimi komanda üçün çətindir. 60-65 dəqiqə çox yaxşı futbol oynadıq. Heyətimiz onsuz da kasaddır. Dünənki məşqdə 15 futbolçu iştirak edib. Zədəlilərimiz var. Geniş həyətimizin olmamasının təsiri oldu ki, gücümüzü 90 dəqiqəyə yaya bilmədik. Bir neçə gün öncə kubok matçı olmasaydı, bu gün 90 dəqiqə yaxşı mübarizə görə bilərdik.

– Zədəli futbolçuların durumu necədir?
– Qorka Laruça xəstələnib. Dünən halı yaxşı deyildi. Marko Nikoliç 2 oyundur ki, bizə kömək edə bilmir. Fərid Nəbiyev də dünən zədələnib.