“Kəpəz” yenidən sponsorsuz qala bilər. Bir müddətdir ki, Gəncə klubunu himayəyə götürmək istəyən iş adamları kənara çəkilməyə qərar verib.

Prosport.Az futbolinfo.az-a istinadən xəbər verir ki, SOCAR-a bağlı olduğu bilinən, amma adı gizli saxlanılan şirkətin nümayəndələri artıq xeyli zamandır kluba maliyyə ayırır.

Komandaya böyük mükafatlar verən, futbolçuları qələbələrə stimullaşdıran himayədarlar rəsmi təqdimat mərasimi keçirərək klubu qəbul etmək istəyirdi. Lakin bürokratik əngəllər onların küsməsinə səbəb olub.

Məsələ ondadır ki, sponsorlar klubu təhvil almaq, rəhbər heyəti tamamilə dəyişmək niyyətindədir. Lakin klubun hazırkı İdarə Heyətinin üzvləri getmək istəmir. Onlar yeni himayədarların yalnız vəsait ayırmasını, idarəçiliyə qarışmamasını arzulayır. Təbii ki, sponsorlar da buna razı deyil. Yeni gələnlər klubu böyütmək üçün öz kadrlarını müxtəlif postlara təyin etmək fikrindədir.

Hətta bu şəxsləri Gəncə klubuna cəlb edən AFFA da onları getməyə razı sala bilmir. Sənədləşmə işləri dayanıb, himayədarlar pul xərclədikləri klubda söz sahibi olmağı bacarmır. Buna görə də onlar geri çəkilməyə qərar verib. Yaxın bir həftə ərzində problem həllini tapmasa, onlar I Liqa klublarından birini himayəsinə götürüb yeni layihəyə başlayacaq.

Maraqlıdır ki, oxşar proses vaxtilə “Turan Tovuz”da, yaxınlarda isə “Mingəçevir”də rahatlıqla reallaşıb. Başıbəlalı Gəncə futbolu isə növbəti dəfə şəxsi maraqların qurbanı olmaq üzrədir.