"Mənə "Qarabağ"da qalmağı təklif etdilər".

Prosport.Az xəbər verir ki, bunu Rusiya millisinin və "Dinamo"nun qapıçısı Andrey Lunyov deyib.

33 yaşlı qolkiper övladı üçün Moskvaya qayıtmağı seçdiyini bildirib: "Oğlumun bu il 5 yaşı tamam oldu. Məktəbə getməyinə az qalıb. Artıq daimi yaşayış yeri haqqında qərar verməyin vaxtı çatmışdı. Ona görə doğulub boya-başa çatdığım şəhərə döndüm".

Oyunçu "Qarabağ" klubunda hər şeydən razı olduğunu söyləyib: "Bakı gözəl şəhərdir, çox rahatdır. Məmnuniyyətlə orada qalardım. Amma övladımın inkişafı üçün Moskvada daha çox imkanlar var. "Qarabağ" öz çempionatında hegemondur və müntəzəm olaraq avrokuboklarda çıxış edir. Mənim üçün əsas olan bu idi. Bu komandaya keçməmişdən əvvəl Türkiyə təmsilçiləri də mənimlə maraqlanırdı. Ən nüfuzlu klub yəqin ki, "Fatih Karagümrük" idi. Məşqçilər korpusunda dəyişiklik oldu, Andrea Pirlo getdi. Sonra məlum oldu ki, klub belimdəki zədəyə görə narahatdır. Mənə maaşsız müqavilə təklif etdilər. Oyunlar üçün pul ödəmək istəyirdilər. Ardınca Kiprin "Apollon" klubu da danışıq apardı. Məni gözlədiklərini və bilet alacaqlarını dedilər. Amma sonra onlardan səs-soraq çıxmadı və "Qarabağ" variantı ortaya çıxdı".

Qeyd edək ki, Andrey Lunyov 2023/2024 mövsümündə "köhlən atlar"ın formasını geyinib.