"Neftçi" Misli Premyer Liqasının XXII turunda səfərdə "Zirə"ni 2:1 hesabı ilə məğlub edib.

Prosport.Az xəbər verir ki, "ağ-qaralar"ın baş məşqçisi Samir Abasov oyundan sonra keçirilən mətbuat konfransında jurnalistlərin suallarını cavablandırıb:

– Bu gün start heyətində 7 yerli futbolçu var idi. Qələbə ruhunun qayıtmasında bu amilin rolu var?
– Rolu var, amma böyük rolu olduğunu deməzdim. Böyük rol odur ki, istər legioner, istər yerliyə o ruhu verəsən. Onlar da bunu meydançada göstərsin. İşlədiyim klublarda legionerlər, deyərdim ki, yerlilərdən geri qalmır. Əsas, ab-havanı düzəltməkdir.

– “Kəpəz”lə kubok matçını da saysaq, son 3 oyunda 3 qələbə. Martın 22-ni gözləyək, düzələcəyik demişdiniz...
– Martın 22-ni demişdim, ancaq hansı il olduğunu deməmişdim. Gözləyək (gülür).

– Dramatik sonluğu sizin dilinizdən eşidək...
– Təbii ki, bütün komandalar qələbə üçün oynayır. Komanda bu istəyi göstərirsə... Bu bizim üçün həmin oyunlardan idi. Qələbə üçün hər şeyi edirik. Qol buraxandan sonra ümid qırılmadı, sadəcə pərişan olduq. Mən özüm enerjimi qələbə üçün sərf etmişdim. Köməkçilərimə dedim ki, qismət budur. Bu qələbə mənim üçün xoşdur.

– Bassala Sambu və yeni gələcək transfer haqda firkiniz necədir?
– Qışda oyunçu gətirmək çətindir. Elə oyunçular var idi ki, onlarla danışıq aparırdıq. Dekabrdan onların klublarına "çökmüşdük". Əfsuslar olsun ki, alınmadı. Hücum planında eyni tempdə oynaya bilməməyimiz bizi narahat edirdi. Düşündük ki, bu gücdən istifadə edək.

– "Forza Neftçi" və Yuri Matiasın ad günüdür. Ad gününü keçirmək üçün məkan hazırdır?
– Hər kəs bazaya gedir. Prosedurlarımız var. Məşqimizi keçdik. Bu ərəfə bizim üçün çox qısadır. Kubok çox önəmlidir. Psixoloji vəziyyətimizi yaxşılaşdırdıq. 3 qalibiyyəti böyük iş kimi görürlər. Öz qrafikimizlə gedəcəyik.

– "Qarabağ"la matçda həmin "Neftçi"ni görə biləcəyik? Fərqli Azərbaycan derbisi ola bilər?
– Bu oyundan sonra ümidlər elədir. Real danışım, "Qarabağ" bizdən güclüdür. Amma öz meydanımızda oynayacağıq. Hər şeyi edəcəyik. Yaxşı nəticə istəyirik. Bu qalibiyyətdən danışaq. Dərhal "Qarabağ"la matça köklənməyək. Məşqlərə başlandan sonra bu haqda düşünəcəyik.