"Uzun müddətdən sonra qalib gəldiyimizə görə şadam. Çoxlu sayda qol epizodları yaratdıq, onların ikisindən fərqlənərək qələbə qazanmağımız gözəl hisslərdir".

Prosport.Az xəbər verir ki, bu sözləri "Sabah"ın baş məşqçisi Vasili Berezutski Misli Premyer Liqasının XXII turunun "Turan Tovuz"la görüşündən (2:1) sonra keçirilmiş mətbuat konfransında deyib.

O, jurnalistlərin suallarını da cavablandırıb.

– Fasilədən sonra 2 qol vuraraq qalib gəldiniz. İlk hissədən sonra nəyi dəyişdiniz?
– Uşaqlarla paltardəyişmə otağında sakitləşdirici söhbətimiz oldu. Müdafiədə olan çatışmazlıqlar barədə danışdıq. İlk hissədə hardasa çəkinərək oynadıq. Amma 2-ci hissədəki oyunumuzdan razı qaldım.

– Razısınız ki, yarımmüdafiənin orta xəttini hələ də düzəldə bilməmisiniz?
– Bu həmişə bəzi kadr məsələləri ilə bağlı olur. Mikrozədələr baş verir. Müəyyən dəyişikliyə də getməli oluruq. Ancaq qarşıdakı həftədən etibarən bütün futbolçular sıraya qayıdacaq. Bu da bizə müəyyən stabillik yaratmağa kömək edəcək. İvan Lepinitsanı da təbrik edirəm. Uzun müddətdən sonra sıraya qayıtdı, start heyətində yer aldı. Onun qayıdışı orta xəttimiz üçün daha da faydalı olacaq.