"2-ci hissənin ilk 15 dəqiqəsinə toparlanmış vəziyyətdə çıxa bilmədik. Bu da 2 qol buraxmağımızla nəticələndi. Sonradan isə nəyisə düzəltmək artıq çətin oldu".

Prosport.Az xəbər verir ki, bu sözləri "Turan Tovuz"un baş məşqçisi Qurban Berdiyev Misli Premyer Liqasının XXII turunun "Sabah"la görüşündən (1:2) sonra keçirilmiş mətbuat konfransında deyib.

O, jurnalistlərin suallarını da cavablandırıb.

– Ayxan Hüseynov və Xəyal Nəcəfovu matçın 85-ci dəqiqəsində meydana buraxdınız. Bunu daha tez etmək olmazdı?
– Tez də buraxa bilərdik. Amma başqa şeylər düşünürdük. Belə alındı.

– "Sabah" sizə nədə sürpriz etdi?
– İlk olaraq biz rəqibə 2-ci toplarda uduzduq. 2-ci qolu buraxdığımız ana gəldikdə, Rəhim Sadıxovun butsu çıxmışdı. Hakimlə uzun mübahisə oldu. Ona fit vermədilər. Uzun mübahisə oldu. Rəqib isə dərhal oynadı və qol vurdular.

– Hakim idarəçiliyindən razı qaldınız?
– Nəsə deməyimlə nəsə dəyişəcəksə, başqa məsələ. Mənim dediklərimlə heç nə dəyişməyəcəksə, danışmağın mənası da yoxdur. Artıq yoruldum deməkdən ki, Jonu əlləri ilə tuturlar, oynamağa imkan vermirlər. Lakin hakim fitini səsləndirmir.