"Məğlub olmalı deyildik. Üstünlük bizim tərəfimizdə idi. Qol epizodları yaradırıq. Oyunumuz onu göstərir ki, hər şey qaydasındadır. Sadəcə, son nöqtəni qoya bilmədik. Bu da düzələcək. "Şamaxı"nı təbrik edirəm. Sevinirlər, amma hələ bizi keçməyiblər. Qarşıda çox oyun var".
Prosport.Az xəbər verir ki, bu sözləri “Sumqayıt”ın baş məşqçisi Vaqif Cavadov Misli Premyer Liqasının XXII turunun “Şamaxı” ilə görüşündən (0:1) sonra keçirilmiş mətbuat konfransında deyib.
O, jurnalistlərin suallarını cavablandırıb.
– 2-ci hissədə komandanızın oyununun alınmamasının səbəbi nədir?
– Məcburi əvəzetmələr oldu, bəzi oyunçularımızın zədəsi üzə çıxdı. Bununla əlaqələndirə bilərəm. Hansısa mövqe səhvinə yol vermədik. Nə baş verdisə, 2-ci hissənin əvvəlində baş verdi. Oyun nəzarətimizdə idi. 1 səhv məğlubiyyətə gətirib çıxardı.
– Komandanın 7 oyundur qol vura bilməməsinin səbəbi nədir?
– Epizodlar var, sadəcə vura bilmirik. Top dirəyə dəyirsə, 2 metrdən qol vura bilmiriksə, nə vaxtsa bu seriya qırılacaq. Əsas odur ki, oyun, qol epizodlarımız var. Qol imkanlarının sayı bizdə daha çox idi. Futboldur, belə şeylər olur. Bir daha deyirəm, hər şey qaydasındadır. 22 xalımız var, 6-cı yerdəyik, Heç bir təlaşa düşmürük, sakitliyimizi qoruyub yolumuza davam edəcəyik.
– Alan Diasın durumu necədir?
– Hələ bilmirik. Əzələsi dartırlıb. Müayinədən sonra dəqiq cavab verə biləcəyik. Sosial şəbələlərdə bizə irad bildirən azarkeşlər gəlib stadionu doldursun. Kənardan danışmaq asandır. Böyük şəhərin bir komandasıyıq, azarkeşlərə ehtiyacımız var.
– "Şamaxı"nın sevinməsini xüsusi qeyd etdiniz. Onlarla hələ 1 oyununuz da qalıb. Revanş hissi var?
– Heç kimə mesaj vermirəm. Sevinməkdə hamı sərbəstdir. Sadəcə olaraq onu deyə bilərəm ki, hələ bizi keçməyiblər. Qol vura bilməməyimizə baxmayaraq, komandam çox yaxşı oyun nümayiş etdirir. Bu sindromu qıracağıq. Futbolçularım özlərinə inansın, hər zaman onların arxasındayam.
– Premyer Liqada sonuncu yeri tutan komandanın I Liqanın 3-cüsü ilə pley-off oynayacağı deyilir. "Sumqayıt" sonuncu olsa, razılaşacaq?
– Mən o barədə düşünmürəm. İnanmıram ki, komandam sonuncu olsun. Belə bir şey olsa, mən burada olmaram. Hər şey yaxşı olacaq, futbolçularımdan razıyam. İnanıram ki, növbəti oyunlarda qələbələrimiz olacaq. Azarkeşlərimizə ehtiyacımız var, gəlib stadionu doldursunlar.