II Liqada mübarizə aparan "Haypers Quba" komandasına yeni baş məşqçi təyin olunub.

Prosport.Az-ın xəbərinə görə, bu, "Sabah"da aşağı yaş qrupları üzrə koordinator və "Vətən"in 17 yaşadək komandasında baş məşqçi işləyən Elvin Həsənovdur.

Uzun müddət aşağı yaş qrupları üzrə çalışan Elvin Həsənov artıq daha da inkişaf etmək üçün "Haypers Quba"da işləməyə razılıq verib. O, "Sabah" və "Vətən"lə müqaviləsinə xitam verəcək. Daha sonra Quba təmsilçisi onun təqdimatını etdikdən sonra növbəti həftədən yeni işinin başında olacaq.

Xatırladaq ki, ötən mövsüm AFFA Region Liqasında mübarizə aparmış "Haypers Quba" noyabrda uğursuz nəticələrə görə baş məşqçi Vüqar Nadirovla yolları ayırıb. Daha sonra komanda Bəhram Şahquliyevə həvalə edilib. Bundan sonra Zaur Hidayətov baş məşqçi təyin olunsa da, o, dekabrda keçirilmiş XI turda "Dinamo" ilə oyundan sonra istefa verib.

Qeyd edək ki, hazırda çempionatda 25 xalla 4-cü sırada olan "Haypers Quba" fevralın 24-də start veriləcək çempionata yeni baş məşqçi ilə çıxacaq. "Haypers Quba" Olimpiya İdman Kompleksində "Şəmkir"i qəbul edəcək. Həmin "Şəmkir"i isə "Haypers Quba"nın sabiq baş məşqçisi Vüqar Nadirov çalışdırır.