"Ferensvaroş" klubunun idman direktoru Tamaş Haynal "Qarabağ"dan Juliu Romaunu transfer etmələri və komandanı tərk edən Kadi Borjesin narazılıqlarına münasibət bildirib.

Prosport.Az xəbər verir ki, funksioner əvvəlcə oyunçuların dəyişdirilməsi barədə danışıb:

"Bu sövdələşmə tərəflər üçün faydalı oldu. "6" nömrə transferi qış pəncərəsində bizim üçün prioritet idi. Maiqinin Avropa Liqasında "Viktoriya" ilə matç ərəfəsində zədələnməsindən sonra bu mövqeyə oyunçu almaq istəyimiz daha da artdı. Biz Romaunun transferi üçün "Qarabağ"la yarım il danışıqlar apardıq. Onlar bizdən 5 milyon avro tələb edirdi. Bu isə bizim üçün böyük məbləğ idi. Amma biz daim futbolçunun oyununu izləyir və hər transfer pəncərəsində təklifimizi irəli sürürdük".

Kadinin narazıqlarına da toxunan Haynal bildirib ki, ötən şənbə günü 2 klub arasında daha bir söhbət zamanı futbolçuların dəyişdirilməsi variantı yaranıb: "Mən dərhal Kadini axtardım. "Qarabağ"la Kadi arasında danışıqların başlamasına razılıq verdik. Cəmi 2 saat ərzində bizə məlumat verildi ki, razılığa gəlinib. Komandadan məcbur göndərilən oyunçu heç bir halda klubunu dəyişməklə bağlı 2 saata razılıq verməz".

Onun sözlərinə görə, "Qarabağ"ın Kadinin transferində motivasiyası futbolçunu yaxşı tanıması ilə bağlı olub: "Kadi "Qarabağ"da əvvəllər oynayıb. Klub onun oyununu bəyənirdi. Bu səbəbdən ona bir növ "itirilmiş oğlanları" kimi baxırdılar. Hazırkı vəziyyətdə futbolçuların dəyişdirilməsi hər iki tərəf üçün faydalı həll yolu oldu. Biz tərəfdən yaxşı hal odur ki, Juliunun 26 yaşı var".