AFFA İntizam Komitəsinin qərarları açıqlanıb.

Prosport.Az xəbər verir ki, Misli Premyer Liqasının XXI turunda qeydə alınan qayda pozuntularına hüquqi qiymət verilib.

“Kəpəz”lə matçda ikinci sarıdan qırmızı vərəqə alan “Sabah”ın futbolçusu İqor Noqeyra 1 oyun cəzalanıb, klubu isə 500 manat cərimə edilib.

“Neftçi” ilə görüşdə 5 futbolçusu sarı vərəqə ilə cəzalanan “Şamaxı” isə 700 manat cərimələnib.

“Səbail”lə görüşdə rəqibi aşkar qol imkanından məhrum edən “Turan Tovuz”un futbolçusu Kauan Martins birbaşa qırmızı vərəqə aldığı üçün 1 oyun diskvalifikasiya edilib. Tovuz təmsilçisi isə 1000 manat cərimə ödəyəcək. Bundan başqa, “Turan Tovuz”un məşqçisi Ruslan Abışov hakimin qərarına etiraz etdiyinə görə birbaşa qırmızı vərəqə aldığı üçün 1-i şərti olmaqla 2 oyun cəza alıb, bölgə klubu isə 1500 manat cərimələnib. Sınaq müddəti 3 ay təyin edilib.

Həmçinin, yerli komandanın azarkeşləri tərəfindən hakimlərin ünvanına kütləvi şəkildə təhqiramiz ifadələr səsləndirildiyinə görə “Turan Tovuz” daha 1000 manat cərimə edilib.

“Sumqayıt”la matçda 4 futbolçusu sarı vərəqə alan “Araz-Naxçıvan” 700 manat ziyana düşüb.

“Zirə – “Qarabağ” oyunu bitdikdən sonra meydançaya kənar şəxs daxil olduğuna görə ev sahibi klub 800 manat cərimə ödəyəcək.