Məlum olduğu kimi, AFFA-ya yeni baş katib təyin olunub. Bu, "Azərletoreya"da baş direktorun müavini işləmiş Cahangir Fərəcullayevdir.

Prosport.Az-ın xəbərinə görə, bu il 44 yaşını tamamlayacaq C.Fərəcullayevin təyinatında AFFA-nın vitse-prezidenti, İctimai Televiziyanın baş direktoru Balakişi (Balaş) Qasımovun rolu olub.

Onlar "Nə? Harada? Nə zaman?" intellektual oyunundan bir-birlərini tanıyır. Balaş Qasımov məhz bu oyunun Azərbaycanda aparıcısı və baş prodüseridir. Üstəlik, yeni baş katib B.Qasımovun rəhbəri olduğu Gametv.az Prodüser Mərkəzində də işləyib.

Bu tanışlıq isə təxminən 20 il əvvələ gedib çıxır. Belə ki, 2007-ci ilin sentyabrında "Nə? Harada? Nə zaman?" oyunu üzrə Millətlər Kubokunun seçmə oyunlarında C.Fərəcullayev Azərbaycanın 2-ci yığma komandasının üzvü kimi mübarizə aparıb.

2015-ci ilin yanvarında "Qaradağ Hill Hotel"ində Azərbaycan Respublikasının Prezidenti yanında Gənclər Fondunun dəstəyi ilə təşkil edilmiş "Nə? Harada? Nə zaman?" oyunu üzrə II Bakı Marafonunun qalibləri arasında C.Fərəcullayev də olub.

C.Fərəcullayev həmin vaxt "Cazz" komandasının kapitanı qismində çıxış edib. Məhz həmin yarışda onun komandası bürünc medal qazanıb.

Qeyd edək ki, Cahangir Fərəcullayev 2019-2020-ci illərdə "Topaz"da baş direktor vəzifəsində də işləyib.