"Qarabağ" Misli Premyer Liqasının XXI turunda səfərdə "Zirə"yə 2:3 hesabı ilə məğlub olub.

Prosport.Az xəbər verir ki, Ağdam təmsilçisinin baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavablandırıb:

– "Zirə"ni, Rəşad Sadıqovu təbrik edirəm. Çox yaxşı, baxımlı oyun oldu. Nəsə işlərimiz düz getmir. Amma mən bunu normal qarşılayıram. Biz geri dönəcəyik. Komandanı hər oyuna tam istədiyimiz kimi hazırlaya bilmirik. 3-4 gündən bir oyunlarımız olur. Bəzi futbolçular çoxdandır ki, oynamırdı, bu gün 90 dəqiqə meydanda oldular. Səhvlərimiz var. Bunu danmırıq. "Zirə" layiqli qələbə qazandı. Qarşıdakı oyunlara hazırlaşacağıq.

– Bu gün 5 əvəzetmə etdiniz. Oyunun gedişatı sizi qane etmirdi?
– Həm oyunun gedişatına görə idi, həm də bəzi oyunçuların hazırlığı istədiyimiz səviyyədə deyil. Bu gün əslində Yassin Benziya ilə Abdellah Zubiri meydana buraxmaq istəməzdim. Onların istirahətə daha çox ehtiyacı var. Futbolda belə hallar olur.

– "Qarabağ"ın ard-arda bu qədər məğlubiyyətlərini xatırlamırıq. Bunun səbəbi nədir?
– Çatışmayan cəhətlər var, yəqin səhvlərimiz çoxdur. İnşallah, qayıdacağıq.

– Benziyanın ayrılacağı ilə bağlı xəbərlər var. Bunlar nə dərəcədə realdır?
– Doğru deyil, Benziya komandadadır.