"2 fərqli hissə izlədik. İlk hissədə komanda olaraq oyunumuz alınmırdı. Dəyişikliklərdən sonra oyunun ritmini ələ keçirməyi bacardıq. Bilirdik ki, ağır səfərdəyik. 1 xala da sevinmək lazımdır. Elə oyun gedirdi ki, məğlub da ola bilərdik, qalib də gələ bilərdik. Yenə də yolumuza davam edirik. Qarşıdakı oyunlara hazırlaşacağıq".

Prosport.Az xəbər verir ki, bu sözləri “Araz-Naxçıvan”ın baş məşqçisi Elmar Baxşıyev Misli Premyer Liqasının XXI turunun “Sumqayıt”la görüşündən (0:0) sonra keçirilmiş mətbuat konfransında deyib.

O, jurnalistlərin suallarını da cavablandırıb.

– Ola bilər ki, rəqib başqa cür oynadı deyə, gözlədikləriniz alınmırdı?
– Vaqif Cavadovun gəlişindən sonra "Sumqayıt" daha dinamik və aqressiv oynayır. Təhlükəli komanda olduğunu bilirdik. Rəqibin üstün cəhətlərini də komandamıza göstərmişdik. Onlar özgüvənli komandadır, yaxşı iş görürlər.

– Samir Abasov bildirmişdi ki, "Qarabağ"dan başqa heç bir klub dominant futbol oynaya bilmir. Bu haqda fikriniz necədir?
– Dominant futbola doğru illərlə getmək lazımdır. Birdən-birə alınan bir şey deyil. Çalışmaq lazımdır. Kim desə ki, "Araz-Naxçıvan" sırf müdafiədə oturub, öz bəxtini əks-hücumlarda axtarır, elə də deyil. Komandadan daha çox hücumda olmaq tələb olunur. Büdcə də lazımdır, istədiyin material da əlinin altında olmalıdır ki, hücumda daha kreativ olasan.

– Qış fasiləsindən sonra meydana çıxdığınız 2-ci oyundur ki, matç aqressiv keçir, sanki oyunlara təzyiq altında çıxırsınız. "Zirə" ilə matçda aqressiya var idi. Bu nədən irəli gəlir, çempionatın gərginliyindən, yoxsa rəqiblərlə bağlıdır?
– Epizodlara da baxsanız, bizim futbolçular necə sarı alırlarsa, burada rəqibi də vurğulamaq lazımdır. Rəqib də yaxşı çalışır ki, onları provakasiyaya çəksin. İdman stresdən ibarətdir. Stresin altında olmalısan ki, hansısa mərhələyə gəlib çıxasan. Sizin sual verməyiniz normaldır. Mən də onu normal şəkildə cavablandırıram. Bizdə nə qıcıq yaradır? 80-cı dəqiqədə "Sumqayıt"ın qapısı qarşısındakı penalti epizodunu heç kim vurğulamır. Amma biz də baxırıq ki, dəqiq penaltidir. Nə VAR-a baxırlar, nə VAR-dan çağırırlar. Möhkəm komandayıq. Bizi bu yolla əzmək istəyirlərsə, əfsuslar olsun ki, onlarda istək olaraq qalacaq. Bizə qarşı diqqətli olsunlar.

– Onda belə çıxır ki, siz 2 cəbhədə mübarizə aparırsınız: meydanda və meydandan kənarda...
– Komanda və məşqçilər olaraq, üzərimizə düşən meydanda mübarizə aparmaqdır. Digər amillər mənlik və komandama aid deyil. Komandama inanıram, möhkəm və sağlam kollektivimiz var. Öz iradəmizdən geri çəkilməyəcəyik.

– Qış fasiləsindən sonra 3 fərqli nəticə qazanmısınız. Qeyri-stabillik davam edəcək?
– Nəticə olaraq, siz bizi qeyri-stabil göstərmək istəyirsiniz. Məni maraqlandıran oyun keyfiyyətidir. Komandam o keyfiyyəti mənə geri qaytarmağa çalışır. Bəzən istədiyim bu oyundakı kimi olur. 5-6 qol epizoduna girirsən, dəyərləndirə bilmirsən. Ona görə nə siz məni, nə də mən komandamı günahlandıra bilərəm. Epizoddur, futboldur, futbolun yazılmamış qanunları var. Onunla barışmalısan.

– Matçın nəticəsini ədalətli hesab edirsiniz?
– Məncə, 1 xala da sevinmək lazımdır. Hər xal dəyərlidir. Onun üzərində dayanmayacağıq. Daha çox qarşıdakı matçlara köklənəcəyik.