"Neftçi" Misli Premyer Liqasının XXI turunda doğma meydanda "Şamaxı"nı 1:0 hesabı ilə məğlub edib.

Prosport.Az xəbər verir ki, "ağ-qaralar"ın baş məşqçisi Samir Abasov oyundan sonra keçirilən mətbuat konfransında jurnalistlərin suallarını cavablandırıb:

– Çempionatdakı bütün komandalarla oynamaq çətindir. Asan oyun yoxdur. Bütün matçlarda bu cür əziyyət çəkməyimiz normal haldır. Hər iki hissədəki çıxışımızdan razı qaldım. Bu gün həddindən artıq nizam-intizamlı oynamağımız, rəqibə epizod verməməyimiz məni çox sevindirdi. "Şamaxı"nın heyətində də əlinə düşən epizodları dəyərləndirməyi bacaran futbolçular var. Bu da biz və digər komandalar üçün çətinlik yaradır. Azərbaycan Kubokunda keçirəcəyimiz oyuna da köklənmişik. Bugünkü qələbə həmin matç üçün bizə bir növ motivasiya oldu. 

– Bu gün bir sıra futbolçuların, ələlxüsus Emin Mahmudovun performansında irəliləyiş gözə çarpdı. Bir həftə ərzində nəyi dəyişdiniz ki, məğlubiyyətdən sonra futbolçular bu cür çıxış etdi?
– Ötən turdakı məğlubiyyətin ən böyük səbəbkarı kimi özümü görürəm. Çünki özüm də reallığa yox, adımıza aldandım. Baxmayaraq ki, həmin qarşılaşmada da nizam-intizamlı çıxış etdik, lakin yenə də deyirəm, adımıza aldandıq. Və nəticə də göz qabağında idi. Bugünkü matçda reallığı ortaya qoyduq. Rəqibə epizod verməməli, həddindən artıq düzgün oynamalıyıq. Bizim də reallığımız budur. Xeyli iş görülməlidir. Bu, qapıçıdan başlamış, hücumçuya qədər olan bir prosesdir. İnşallah, qarşıdakı oyunlarda da "Neftçi"nin reallığını göstərməyə çalışacağıq.

– Etiraf edək ki, ilk yarım saat ərzində "Şamaxı" daha yaxşı çıxış edirdi...
– Andrey Ştoqrin xeyli müddət meydanda olmadı, daha sonra isə əvəzləndi. Onun yerinə meydana daxil olan Ervin Kofidə təngənəfəslik vardı, çünki birdən-birə meydana daxil olmuşdu. Bu amili nəzərə alsaq, rəqibə üstünlük vermiş olduq. Lakin sonradan matça nəzarəti ələ ala bildik.