Dünən Polşada keçirilən III Avropa Oyunlarında Azərbaycan daha 4 medal qazanıb.

Prosport.Az-ın xəbərinə görə, karatedə İrina Zaretskaya ardıcıl 3-cü dəfə çıxış etdiyi Avropa Oyunlarının finalında qızıl medal qazanıb.

Taekvondoçu Səyyad Dadaşov gümüş medal qazanıb. Karateçi Asiman Qurbanlı ardıcıl 2-ci dəfə Avropa Oyunlarının medalına yiyələnib. Bu dəfə o, Minskdə qazandığı qızıl medalı bürüncə dəyişib. Dağıstanlı legionerimiz, taekvondoçu Həşim Məhəmmədov da bürünc medalla kifayətlənib.

Bununla da medallarımızın sayı 5-ə çatıb. Bunlar 2 qızıl, 1 gümüş və 2 bürünc medaldır. Bir gün əvvəllə müqayisədə Azərbaycan yerində sayıb. Komandamız medal sıralamasında yenə 10-cu sıradadır. Bu dəfə komandamızın medal sıralamasına Danimarka və Portuqaliya şərikdir.

İlk sırada liderliyi İspaniya Ukraynadan alıb. İspaniyalılar 9 qızıl, 5 gümüş və 4 bürünc medal qazanıblar. İtaliya yenə hamıdan çox medal qazanıb – 25! Sadəcə, italyanlar əyara görə 2-ci sıradadır (8-8-9). Meydan sahibi Polşa yenə 3-cüdür (6-2-4).

Qeyd edək ki, indiyədək 48 ölkədən 35-i medal qazanıb.