FKSB Avropa Liqasının Liqa mərhələsinin VII turu çərçivəsində Bakıda "Qarabağ"ı 3:2 hesabı ilə məğlub edib.

Prosport.Az xəbər verir ki, Rumıniya təmsilçisinin CAR-da doğulmuş yunan baş məşqçisi Elias Xaralambus matçdan sonra keçirilən mətbuat konfransında jurnalistlərin suallarını cavablandırıb:

– Çox sevinirəm, oyunçularımla fəxr edirəm. Vacib 3 xal qazandıq, gözəl oynadıq. Çox çətin olacağını bilirdik. Həqiqətən belə oldu. Əziyyət çəkdik. Amma əziyyətimizin bəhrəsini gördük. Futbolda bəzən bəxt amili də əhəmiyyətlidir. Bu gün bir az bəxtimiz də gətirdi. İlk dəqiqədə qol buraxmaq çətin idi. "Qarabağ" çox pressinq edirdi. 3-cü qol gəldikdən sonra qələbəni qazandıq.

– Kapitan Darius Olarunun yoxluğu sizin üçün çətin oldu?
– Olaru böyük, yaxşı oyunçudur. Bu gün yox idi. Alternativlər üzərində fikirləşməliydik. Komandamızda yüksək keyfiyyətli oyunçular var. Həll yolları tapmalıydıq. Bu gün bunu etdik.

– “Qarabağ” tərəfdən hansısa sürprizlə qarşılaşdınız?
– Nəyə ümid edirdiksə, onu gördük. “Qarabağ”ı araşdırmışdıq. Çətin oyun oldu, əziyyət çəkdik. Avropadakı oyunlar belədir, əziyyət çəkilir. “Qarabağ” güclü komandadır. “Ayaks”la”, “Lion”la, “Zirə” ilə matçda da hücumameyilli, güclü və sərt oyun göstərir. Qurban Qurbanova və komandaya böyük hörmətim var. “Qarabağ” çox gözəl komandadır.