"Qarabağ" UEFA Avropa Liqasında növbəti oyununu keçirib.

Prosport.Az xəbər verir ki, Azərbaycan çempionu Liqa mərhələsinin VII turunda Rumıniyanın FKSB klubunu qəbul edib.

Tofiq Bəhramov adına Respublika stadionunda oynanılan qarşılaşma qonaqların qələbəsi ilə başa çatıb – 3:2.

Matçda hesabı erkən qolla meydan sahibləri açıb. Leandru Andrade 1-ci dəqiqədə rəqib qapısına yol tapıb. Cəmi 6 dəqiqə sonra FKSB Adrian Şutun qolu ilə tarazlığı bərpa edib. 41-ci dəqiqədə Rumıniya klubunun heyətində kamerunlu müdafiəçi Coyskim Dava avtoqol müəllifi olub. Qonaqlar ilk hissənin əsas vaxtına əlavə olunmuş sonuncu – 4-cü dəqiqədə hesabı bərabərləşdirib. Bu dəfə David Mikulesku fərqlənib.

İlk hissə bu hesabla başa çatıb. Oyunda son nöqtəni isə komandanı kapitan kimi meydana çıxarmış Adrian Şut qoyub. O, 73-cü dəqiqədə topu başla qapıdan keçirməklə dubl edib. Bununla da "Qarabağ" hər 3 qolu standart vəziyyətlərdən sonra buraxıb.

Bu nəticədən sonra 3 xalı olan "Qarabağ" növbəti mərhələyə çıxmaq şanslarını itirib.

Ağdam təmsilçisi Liqa mərhələsində son görüşünü yanvarın 31-də Yunanıstanda "Olimpiakos"a qarşı keçirəcək. Həmin matç rəqibdən fərqli olaraq, Qurban Qurbanovun yetirmələri üçün formal xarakter daşıyacaq.