“Qarabağ”la Türkiyənin “Qalatasaray” klubu arasında daha bir yoldaşlıq matçı keçiriləcək.

Prosport.az xəbər verir ki, bu barədə qol.az-a açıqlamasında İstanbul klubunun İdarə Heyətinin üzvü Emin İmanov məlumat verib.

Matçın ən yaxın zamanda keçiriləcəyini deyən klub rəsmisi dəqiq tarixin hələ müəyyənləşmədiyini bildirib: “Qarabağ”la əməkdaşlığımız yüksək səviyyədə davam edir. Bu il daha bir yoldaşlıq oyunu keçirmək istəyirik. Görüş İstanbulda olacaq. Hər iki komanda Avropa Liqasında çıxış edir. Ona görə də oyun qrafikləri sıxdır. Amma bir oyun təşkil olunacaq. Vaxtı demək bir az çətindir. Çünki dediyim kimi, komandaların oyun sayı çoxdur. Klubların rəhbərliyi arasında danışıqlar gedir. Yəqin ki, ən qısa vaxtda matç keçirilər”.

Xatırladaq ki, “Qarabağ”la “Qalatasaray” 2023-cü il martın 26-da Bakıda qarşılaşıb. Xeyriyyə məqsədilə keçirilmiş həmin yoldaşlıq matçı Türkiyə klubunun 2:1 hesablı qələbəsi ilə başa çatıb.