Bir neçə gündür Türkiyə və Azərbaycan mətbuatında Fatih Təkkənin AFFA-da təsis olunacaq Futbol direktoru vəzifəsini tutacağı ilə bağlı xəbərlər dolaşır.

Prosport.Az xəbər verir ki, bu iddia ilə bağlı “Futbol+” qəzetinə açıqlama verən qurumun Mətbuat və İctimaiyyətlə Əlaqələr Departamentinin rəhbəri Elnur Məmmədli hansısa təyinatdan söhbət getmədiyini deyib.

Fatih Təkkə isə tamam fərqli fikir səsləndirib: “Bəli, bir neçə gün əvvəl AFFA rəhbərliyinin dəvəti ilə Bakıda olduq. Həmin şəxslərlə müəyyən görüşlər keçirildi. Hər şey yaxşı keçdi. Bakıya ilk səfərim idi. Qardaş ölkədə olmaq mənim üçün önəmli hadisədir. Azərbaycan futbolu ilə bağlı informasiya topladıq, üstün tərəflərini və çatışmazlıqlarını öyrəndik.

Düzü, bizdən konkret nə istədiklərini anlaya bilmədik. Hər halda, ziyarətimiz çox yaxşı keçdi. Bakıya səfərimin səbəbi Azərbaycan futboluna necə fayda verə biləcəyimlə bağlı idi. Açığı, bu yöndə gözləntilərimiz qarşılanmadı.

Əvvəlcədən deyilənlərlə sonradan edilən söhbətlər arasında bağlılıq yox idi. Sadəcə, maraqlı söhbət etmiş olduq. Sonda ortaya nəsə çıxmadı. Bir neçə gündən sonra mənimlə əlaqə saxlayacaqlarını demişdilər. Hələ ki xəbər yoxdur. 3-4 gündür ki, Türkiyədəyəm. Qardaş ölkədə futbolun inkişafı üçün əlimizdən gələni etməyə hazırıq".