"Qarabağ" Avropada kifayət qədər təcrübəsi olan komandadır. Hazırda turnir cədvəlində aşağı pillələrdə qərarlaşsalar da, bu klubla qarşılaşma çox çətin olacaq".

Prosport.Az xəbər verir ki, bu sözləri Rumıniyanın FKSB klubunun baş məşqçisi Elias Xaralambus UEFA Avropa Liqasının əsas mərhələsində Bakıda “Qarabağ”a qarşı keçirəcəkləri VII tur oyunundan öncə təşkil olunan mətbuat konfransında deyib.

45 yaşlı yunan mütəxəssis komandasının yaxşı vəziyyətdə olduğunu bildirib: "Komanda daxilində heç bir problem yoxdur. Biz matça hazırıq. Psixoloji və fiziki cəhətdən futbolçuları oyuna yaxşı hazırlamışıq. Rəqibin aktivində xalının az olması bizi arxayınlaşdırmamalıdır. Ümid edirəm ki, nəticə xeyrimizə olacaq".

O, Ağdam təmsilçisinin aparıcı futbolçusu Juninyunun Braziliyanın "Flamenqu" klubuna keçidinin oyunun nəticəsinə təsir göstərməyəcəyini söyləyib: "Düşünmürəm ki, bu amil "Qarabağ"ın oyununa pis təsir etsin. Bizim də heyətimizdə itkilər var. Əsas oyunçularımız sabah meydana çıxa bilməyəcək. Bizim öz oyun üslubumuz var. Zədəli futbolçuların boşluğunu doldurmağa çalışacağıq".

Qeyd edək ki, yanvarın 23-də Tofiq Bəhramov adına Respublika Stadionunda keçiriləcək “Qarabağ” – FKSB matçı saat 21:45-də başlayacaq.