"Qarabağ" rəsmiləri Rumıniyanın FKSB klubuna qanalı futbolçu Baba Əl Həssənin UEFA Avropa Liqasının VII tur matçı üçün Azərbaycana gəlişində ortaya çıxan viza probleminin həllinə kömək edib.

Sportnet.az xəbər verir ki, bu barədə Buxarest təmsilçisinin baş meneceri Mihay Stoyka açıqlama verib.

"Elə indicə qeyri-adi xəbər aldım. Əl Həssənin viza problemi var idi. "Qarabağ" əməkdaşları bizə kömək etdilər. Futbolçumuzun viza aldığını bildikdə xeyli sevindik", - deyə o bildirib.

Stoyka əlavə edib ki, bəzi ölkələrin vətəndaşları üçün viza almaq çox çətindir: "Vizaları onlayn qaydada alırıq. Lakin elə ilk mərhələdəcə Azərbaycan səfirliyindən bildirildi ki, problem yoxdur".

25 yaşlı Əlhəssən FKSB-nin aparıcı futbolçularından sayılır. Cari mövsümdə o, bütün yarışlarda 32 dəfə forma geyinib.

Qeyd edək ki, yanvarın 23-də Tofiq Bəhramov adına Respublika stadionunda keçiriləcək "Qarabağ" - FKSB matçı saat 21:45-də başlanacaq.