"Turan Tovuz" Misli Premyer Liqasının XIX turunda Tovuz şəhər stadionunda "Kəpəz"ə 2:5 hesabı ilə məğlub olub.

Prosport.Az xəbər verir ki, tovuzluların baş məşqçisi Qurban Berdiyev oyundan sonra keçirilən mətbuat konfransında jurnalistlərin suallarını cavablandırıb:

- "Kəpəz" layiqli qələbə qazandı. Onları təbrik edirəm. Planlaşdırdıqlarımızı edə bilmədik. Bizdə alınmadı.

- Son 8 oyunda 1 qələbə var. Səbəbi nədir?

- Təbii ki, müəyyən səbəbləri var. Sırf bu oyuna gəldikdə, bu gün heç nə alınmadı. Digər matçlara baxsaq, pis oynamamışdıq. Təhlillər edib səbəbləri axtaracağıq.

- Orxan Əliyevi transfer etməyinizin səbəbi nədir?

- Orxan pis futbolçu deyil. İlk matçıdır, bir az həyəcan var idi. Yavaş-yavaş düzələcək.

- Planlaşdırdığınız nələr alınmadı?

- Sadiq Quliyev ilk dəfədir oynayırdı, Araş Qaderi xəstəlikdən sonra qayıdıb. Müdafiədəki problemlər öz təsirini göstərdi. Standart vəziyyətlərdə ciddi səhvlərimiz var idi. Belə qollar buraxacağımızı gözləmirdik. Çünki standart vəziyyətlərin üzərində çox işləyirdik.

- Ehtiram Quliyev bildirib ki, Qurban Berdiyev bizə avrokuboklar sözü verib. Bunun komandaya psixoloji təsiri oldu?

- Xeyr. Məqsəd eyni olaraq qalır. Sadəcə olaraq, nəticələr çıxarıb yolumuza davam etməliyik.