"Zirə" Misli Premyer Liqasının XIX turunda öz meydanında "Araz-Naxçıvan"ı 1:0 hesabı ilə məğlub edib.

Prosport.Az xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandırıb:

– Fasilədən sonra ilk oyun olmasına baxmayaraq, hər iki komandanın futbolçuları aqressivlik, ustalıq göstərdi. Sanki fasilə olmayıb. Oyun bizim üçün uğurlu başladı. İlk dəqiqələrdə fərqləndik. Yenə təhlükəli hücumlarımız var idi. Sonra oyuna nəzarət rəqibə keçdi. İlk hissənin 2-ci yarısını yaxşı keçirmədik. Fasilədən sonra daha aqressiv, istəkli idik. Hamımız rəqibin gücünü bilirik. Elmar Baxşıyev möhkəm, yaxşı komanda formalaşdırıb. Oyunçularımın çıxışından razı qaldım. Rəqibi təbrik edirəm.

– Narazı qaldığınız məqamlar oldu?
– İtkilərimiz var. Davit Volkovi 10 gün idi ki, məşq etmirdi, dünən məşq etdi. Ehtiyatda oturmuşdu. Qola ehtiyacımız olsaydı, onu meydana buraxacaqdıq. Rüstəm Əhmədzadə də ehtiyatda idi. Digər futbolçularımız fiziki cəhətdən ideal ola bilməzdi. İlk turlarda bu, bütün komandalar üçün keçərli olur. Hamı formasını bərpa etdikdən sonra daha istəkli, ambisiyalı olmaq istəyirik.

– Baş verən hadisələrə necə şərh verərdiniz? Nələr baş verdi ki, Qara Qarayev aqressivləşdi?
– Çox üzücüdür ki, 2 komanda arasında belə şey baş verdi. Şükür, böyük insident olmadı, ola da bilməz. 2 komanda arasında rəhbərlik, məşqçilər və futbolçular səviyyəsində çox yaxşı münasibət var. Arada nə oldu bilmirəm, Qara əsəbiləşdi. Sarı vərəqəsi olduğu üçün müdaxilə etdim ki, sakitləşsin. Dedim ki, özünə də zərər verəcəksən. Orada çox adam var idi, düz-əməlli danışa bilmədim. İstəməzdik ki, nəsə olsun. 2-ci hissədə daha böyük hadisələr olmalı idi, amma klublar arasındakı yaxşı münasibətə görə meydanda hər şey yaxşı oldu.