I Liqanın autsayderi olan "Mingəçevir"in yeni məşqçilər korpusu müəyyənləşib.

Prosport.Az-ın əldə etdiyi xəbərə görə, komandaya 18 yaşadək millimizdən ayrılmış Füzuli Məmmədov təyin olunub.

O, "Qaradağ-Lökbatan"da bir yerdə çalışdıqları, "Mingəçevir"in sabiq baş məşqçilərindən olmuş Azər Həşimovu özünə köməkçi götürəcək. Onun digər köməkçiləri Rafael Əmirbəyovla Mehman Yunusov olacaq. Qapıçı üzrə məşqçilik isə Rauf Mehdiyevə tapşırılıb. R.Əmirbəyovla R.Mehdiyev Füzuli Məmmədovla birgə U-18 millisində də olub.

Qeyd edək ki, ASTA-nın tezliklə sponsorluq müqaviləsi imzalayacağı "Mingəçevir" 2-ci dövrəyə 6 xalla sonuncu – 10-cu kimi başlayacaq. Yeni məşqçilər korpusunun məqsədi komandanı I Liqada saxlamaq olacaq.