Braziliyanın "Flamenqu" klubu "Qarabağ"ın hücumçusu Juninyunu Qabiqol ləqəbli Qabriel Barbazonanın yerinə transfer edib.

Prosport.Az-ın xəbərinə görə, Milan "İnter"inin və "Benfika"nın sabiq futbolçusu yeni ildən "Kruzeyru"da oynayacaq.

Bu səbəbdən də bu il 130 yaşını qeyd edəcək "Flamenqu"nun yeni rəhbərliyi prezident Bapın istəyi sayəsində Juninyu ilə bu boşluğu doldurmağa çalışır. Braziliya mətbuatı cümə gününə kimi müqavilənin bağlanılacağını bildirir. Müqavilənin müddəti 3 illik olacaq və transfer üçün "Qarabağ"a 4 və 5 milyon avro aralığında pul ödəniləcək.

Futbolçuya şəxsən zəng edən isə "Ayaks", Madrid "Real"ı, "Deportivo", "Atletiko", "Çelsi" kimi klublarda olmuş Filipi Luis olub. 39 yaşlı məşqçi ötən ildən karyerasını bitirdiyi bu klubu çalışdırır. Müqavilə sözügedən müddətdə bağlansa, Juninyu yeni komandası ilə ABŞ-də keçiriləcək təlim-məşq toplanışına qatılacaq.

Qeyd edək ki, İspaniya mətbuatının yazdığına görə, “Sebiya” “Qarabağ”a Juninyu üçün təxminən 4 milyon avro, futbolçunun özünə isə illik 700 min avro maaş təklif edib. “Flamenqu” isə “Qarabağ”a təxmini olaraq 5 milyon avro, futbolçuya isə illik 2 milyon avrodan çox maaş verəcək. Bu da futbolçunun fikrini dəyişməsinə, məşhur "Marakana"da çıxış etmək üçün bəhanə olub.