Aşağı yaş qrupları üzrə yığmaların baş məşqçilərinin kimliyi qarşıdakı 10 gün ərzində müəyyənləşəcək.

Prosport.Az xəbər verir ki, bu barədə AFFA-dan sportinfo.az-a bildirilib.

Verilən informasiyaya görə, U-15, U-16, U-17, U-19 və U-21 yığmalarını çalışdıracaq mütəxəssislərin siyahısı hazırlanmaq üzrədir.

Federasiya rəhbərliyi bu məsələni texniki direktor Cahangir Həsənzadəyə tapşırıb. Onun tərtib etdiyi siyahı İcraiyyə Komitəsinin qarşıdakı toplantısında müzakirəyə çıxarılacaq.

Yanvarın 1-dən etibarən bu komandaların sükanı arxası boşdur. AFFA funksionerləri hazırda 2 variantı nəzərdən keçirir. Ya millilər əcnəbi məşqçilərə tapşırılacaq, ya da yerlilərə.

Vitse-prezident Elşad Nəsirov başda olmaqla, bir qrup xaricilərə üstünlük verməyin tərəfdarıdır. İcraçı vitse-prezident və baş katib Sərxan Hacıyev isə azərbaycanlı məşqçilərin təyinatını istəyir.