Adı İspaniyanın “Sevilya” klubunun rəsmi transfer siyahısında olan “Qarabağ”ın hücumçusu Juninyu ilə daha bir əcnəbi klubun maraqlandığı iddia edilib. Budəfəki klub isə artıq Avropa qitəsini təmsil etmir.

Prosport.Az xəbər verir ki, “Qarabağ”la “Sevilya” arasında danışıqların uğurla davam etdiyi bir vaxtda Juninyu üçün daha bir təklif vətəni Braziliyadan gəlib. İddia edilir ki, bu ölkənin “Flamenqo” klubu da Juninyunun xidmətində maraqlıdır.

Məlumata görə, Rio-De-Janeyro təmsilçisi hücumçusu Qabriel Barbozanın gedişinə hazırlaşır və onun əvəzləyicisi qismində Juninyunu görür. Hətta klubun bunun üçün “Qarabağ”a 5 milyon avro təklif etməyə hazır olduğu da bildirilir.

Bu məbləğ “Sevilya”nın “Qarabağ”a təklif etdiyindən artıqdır. Son məlumata görə, “Sevilya” Juninyunun transferi üçün Ağdam klubuna 4 milyon avro (üstəgəl, 500 min bonus) yenilənmiş təklif irəli sürüb.

İspan mediası yazır ki, Braziliya klubunun təklifi “Sevilya”ya problem yarada bilər. Amma ispanlar transferin baş tutacağına ümidlərini də itirməyiblər.