“Qarabağ”ın hücumçusu Redon Cicanın Albaniyanın “Eqnatiya” klubuna keçəcəyi ilə bağlı xəbərlər yayılıb.

Prosport.Az xəbər verir ki, "Eqnatiya”nın Cicanı qışda transfer edib-etməyəcəyini dəqiqləşdirmək üçün klubun idman direktoru Kleydi Zenelay sportal.az saytına açıqlama verib.

Albaniya çempionunun rəsmisi Cica məsələsi haqda qısa və konkret danışıb. Kleydi Zenelay “Qarabağ”ın hücumçusunu transfer etmək haqda düşünmədiklərini deyib:

"Cicanı təbii ki, yaxşı tanıyırıq. Onun “Qarabağ”da çox oynamadığından da xəbərdarıq. Amma “Eqnatiya” ona maraq göstərmir. Bu mənada Cica haqda nəsə deməyim doğru olmaz".

Qeyd edək ki, Redon Cica 2023-cü il yanvarın 24-də “Tirana”dan “Qarabağ”a keçmişdi. O, 2026-cı il iyunun 30-na qədər Ağdam klubuna məxsusdur.