Fabio Kannavaro Zaqreb "Dinamo"sunun baş məşqçisi təyin olunub.

Prosport.Az xəbər verir ki, bu barədə Xorvatiya çempionu sosial şəbəkə hesabından paylaşım edib.

İtaliyalı mütəxəssis baş məşqçi vəzifəsində bu gün istefaya göndərilən Nenad Byelitsanı əvəzləyib. Kannavaro yeni klubunda fəaliyyətə yanvarın 3-də başlayacaq.

Bu mövsüm "Qarabağ"ın Çempionlar Liqasının əsas mərhələsinə yolunu kəsən "Dinamo" 18 turdan sonra 29 xalla turnir cədvəlinin 3-cü pilləsində qərarlaşıb. Zaqreblilər lider "Riyeka"dan 7 xal geri qalırlar.

Qeyd edək ki, Fabionun rəhbərlik etdiyi son komanda "Udineze" olub. O, bu ilin iyununda vəzifəsini tərk edib.