Bu gün Bakı vaxtı ilə saat 22:30-da Polşanın Krakuf şəhərində III Avropa Oyunlarının açılış mərasimi keçiriləcək.
Prosport.Az ilk dəfə 2015-ci ildə Azərbaycanda, 2-ci dəfə 2019-cu ildə Belarusda keçirilmiş Avropa Oyunlarının builki proqramı haqda məlumatı təqdim edir.
Əvvəl ondan başlayaq ki, yarışın rəsmi olaraq Polşanın Krakuf şəhəri və Mavopolska (Kiçik Polşa) regionunda keçirildiyi bildirilir. Əslində isə Sileziya regionunda yerləşən Byelsko-Byava, Xojuf, Vrotsvaf şəhərləri, Subkarpatya regionundakı Jeşuf şəhəri də ev sahibliyi edir. Mavopolska bölgəsində olan şəhərlərdən Kjeşovitse, Krınitsa-Zdroy, Novı Sonç, Oşfyentsim, Tarnuf, Zakopane, Novı Tarq və Mışlenitsedə də bəzi yarışlar keçiriləcək.
26 idman növü yarışda təmsil olunacaq. Bunlar 3x3 basketbol, kamandan oxatma, üzgüçülük (sinxron üzgüçülük və suya tullanma), atletika, badminton, çimərlik həndbolu, çimərlik futbolu, boks, breyk dans, kanoe (slalom və sprint), velosiped idmanı (BMX sərbəst və dağ velosiped yarışı), qılıncoynatma, cüdo, karate, kikboksinq, müasir pentatlon, muaytay, padel tennisi, 7 nəfərə reqbi, atıcılıq, xizəklə tullanma, idman dırmanması, stolüstü tennis, taekvondo, teqbol və triatlondur.
Həmçinin, dağda qaçış, maşın yarışı, şahmat, ampute futbol, sumo və səmti müəyyənləşdirmə idman növləri müsabiqədən kənar yarışlar kimi qəbul edilib.
48 ölkənin təxminən 7 min idmançısı bu yarışda mübarizə aparacaq. Ukrayna ilə qonşu olan Polşadakı yarışda Rusiya və Belarus idmançılarının neytral statusda çıxışı belə nəzərdə tutulmayıb. Avropa Olimpiya Komitəsinin qaçqın komandasının 5 üzvü də bu yarışda çıxış edəcək.
Dünən atletika və çimərlik həndboluna, bu gün isə sinxron üzgüçülük, 3x3 basketbol, kanoenin sprint və velosiped idmanının BMX növündə, eləcə də padeldə yarışlara start verilib. Sabah Azərbaycan ilk medallarını karate və atıcılıq idman növündə qazana bilər. III divizionda atletika komanda yarışlarında çıxış edən Azərbaycan ilk 2 günün nəticəsinə əsasən 129 xalla 12-ci sıradadır.
Ümumiyyətlə, Azərbaycan yarışda 14 idman növündə 100 idmançı ilə təmsil olunur. Bunlar atletika (14 nəfər, Xojuf), kamandan oxatma (1 nəfər, Krakuf), badminton (4 nəfər, Tarnuf), çimərlik futbolu (12 nəfər, Tarnuf), boks (12 nəfər, Novı Tarq), qılıncoynatma (11 nəfər, Krakuf), cüdo (11 nəfər, Krınitsa-Zdroy), karate (8 nəfər, Byelsko-Byava), muay-tay (4 nəfər, Mışlenitse), kikboksinq (2 nəfər, Mışlenitse), padel (2 nəfər, Krakuf), atıcılıq (10 nəfər, Vrotsvaf), taekvondo (8 nəfər, Krınitsa-Zdroy) və triatlon (1 nəfər, Krakuf) idman növləridir.
Azərbaycan idmançılarının daha çox uğur qazana biləcəyi güləş, cüdo (fərdi olaraq yoxdur, komanda yarışıdır) və sambo bu turnirdə yoxdur. Bu da Polşanın Rusiyaya görə bu idman növlərini proqrama daxil etməməsi ilə əlaqələndirilə bilər.
Yarışlar Avropa və Braziliya istisna olmaqla, Latın Amerikası ölkələrində də yayımlanacaq. Ölkəmizdə yayımçı şirkət "CBC Sport"dur.
Yarışın açılış və bağlanış mərasimi (2 iyul) "Qarabağ"a yaxşı tanış olan Krakuf "Visva"sının Henrik Reyman adına Myeyski stadionunda keçiriləcək. 33 326 tamaşaçı tutumuna malik arenada yarışlardan yalnız reqbi nəzərdə tutulub.
Hazırladı: Səbuhi Musa