"Qarabağ"ın I təsnifat mərhələsindəki rəqibi olan Cəbəllüttariqin "Linkoln Red İmps" komandasının adının maraqlı tarixçəsi var.
Prosport.Az bu materialda bu barədə məlumat verir.
Klub 1976-cı ild Çarlz Polson və Çarlz Hed tərəfindən yaradılıb. Komanda gənc polislərdən qurulub və "Blue Batons" (Mavi dəyənəklər) adlandırılıb və Cəbəllüttariqin IV divizionunda mübarizə aparıb. İndi də komandanın ləqəbi "mavi dəyənəklər"dir. Baxmayaraq ki, klubun rənglərində mavi yoxdur.
Bəs klub necə oldu ki, İngiltərənin Linkoln şəhərinin adını götürməyə başladı? Məsələ burasındadır ki, klubu bir müddətdən sonra "Şefild Yunayted"in sabiq prezidenti Req Brili maliyyələşdirməyə başladı. O, Çarlz Polsonun dostu idi və Linkoln şəhərinin sakini idi. Dostlar qərarlaşıb klubun adını "Linkoln" qoydular. Lakin bu adda 1884-cü ildən İngiltərədə klub fəaliyyət göstərirdi. Bu səbəbdən də klubun adına Linkoln şəhərinin rəmzi sayılan "İmps" sözü artırılmağa başlandı.
Bəs "İmps" nədir? Britaniyada "imps" kiçik şeytanlara, şeytan balalarına deyilir. Bu "imps"lərin arxitektur qrotesklərini Linkoln şəhərində – Linkoln Kafedralı və Linkoln Kollecinin binasında görmək mümkündür.
XIV əsrə aid bir əfsanəyə görə, imp adlı 2 yaramaz məxluq Şeytan tərəfindən yer üzündə pis iş görmək üçün göndərilir. Şimali İngiltərədə qarışıqlığa səbəb olduqdan sonra, onlar Linkoln Kafedralına gəlib, burada masa və stulları sındırıb və yepiskopu yıxıblar. Daha sonra İlahilər kitabından bir mələk çıxıb onlara dayanmağı əmr edəndə impslərdən biri cəsarətli olub mələyə daş atmağa başlayıb, digəri isə qorxaraq qırıq stol və stulların altında gizlənib. Mələk birinci impi daşa çevirib və ikincisinə isə qaçmaq şansı verib. Deyilənə görə, hətta sakit günlərdə də kafedralın ətrafı həmişə küləkli olur. Bunu isə dostunu binanın ətrafında axtaran ikinci implə əlaqələndirirlər. Çox qəribədir ki, indi məhz bu qırmızı imp Linkoln şəhərinin simvolu sayılır.
Klub 1984-cü ildə I divizionun qalibi olduqdan sonra elitada çıxış edib və düz 27 dəfə çempion olub, 19 dəfə də kubok qazanıb. Komandanın baş məşqçisi ispan Xavi Munyosdur. Bu səbəbdən komandada 8 İspaniya vətəndaşlığı daşıyan futbolçu var. Komanda 2021/22 mövsümündə UEFA Avropa Konfrans Liqasında qrup mərhələsinə düşməklə Cəbəllüttariq futbolunun tarixinə düşüb. Ötən mövsüm isə həmin turnirin II təsnifat mərhələsində Qazaxıstan "Tobol"una uduzmaqla (0:1, 0:2) avrokubok mübarizəsini dayandırıblar.
"Linkoln Red İmps" ev oyunlarını "Viktoriya" stadionunda keçirir. 1926-cı ildə ilk dəfə Britaniya hərbçilərinin istifadəsi üçün açılmış stadionun tutumu 2 mindir (digər mənbəyə görə 5 min). Cəbəllüttariq millisi və buranın bütün klubları ev oyunlarını sözügedən arenada keçirir. Bu səbəbdən də stadion süni örtüklüdür.
Hazırladı: Səbuhi Musa
