Azərbaycanın qadın futbolçulardan ibarət yığması bu ilin sonunda Rusiya millisi ilə 2 yoxlama matçı keçirəcək.

Prosport.Az xəbər verir ki, ruslar noyabrın 24-dən dekabrın 3-nə qədər Soçidə təlim-məşq toplanışı keçəcək. Azərbaycanla oyunlar da toplanış zamanı baş tutacaq.

Görüşlər noyabrın 28-də "Fişt" stadionunda və dekabrın 2-də "Soçi" klubunun məşq bazasında qapalı rejimdə keçiriləcək. Oyunlar Bakı vaxtı ilə saat 18:00-da başlayacaq.

Qeyd edək ki, Rusiya və Azərbaycanın qadınlardan ibarət milliləri daha əvvəl 2 dəfə münasibətləri aydınlaşdırıb. 2021-ci ilin sentyabrında Azərbaycan yığması dünya çempionatının seçmə mərhələsində Moskvada rəqibinə 0:2 hesabı ilə məğlub olub. Həmin ilin noyabrında Bakıda baş tutan qarşılaşma da Rusiya yığmasının qələbəsi ilə yekunlaşıb – 4:0.