Bu gün millimiz UEFA Millətlər Liqasında mütləq İsveçə qalib gəlməlidir.

Prosport.Az xəbər verir ki, komandamızın qrupda sonuncu olması rəsmiləşsə də, D Liqasına düşməsi rəsmiləşməyib.

Komandamız növbəti mövsüm də nisbətən güclü komandaların yer aldığı C Liqasında mübarizə aparmaq istəyirsə, mütləq qrup liderliyini təmin etmiş İsveçə Stokholmda qalib gəlməlidir. Millətlər Liqasının yeni reqlamentinə görə, C Liqasında bütün qrup sonuncuları D Liqasına yuvarlanmır.

Hazırda C Liqasında qrup sonuncuları Latviya (4 xal), Lüksemburq (3 xal), Azərbaycan (1 xal) və növbəti mövsüm D Liqasında çıxışı dəqiqləşmiş Litvadır (0 xal). Millimizdən fərqli, bu 3 komanda artıq qrupda bütün 6 oyununu keçirib. Yalnız Azərbaycan bu gün İsveçə qalib gələcəyi halda, xallarını 4-ə yüksəltmiş olacaq. Belə olan halda, komandamız Lüksemburqu qabaqlayacaq.

C Liqasının ən yaxşı 2 qrup sonuncusu isə D Liqasının 2-ciləri olan Cəbəllüttariq və ya Malta ilə qarşılaşacaq. Pley-offun püşkü noyabrın 22-də atılacaq. Həmin matçlar isə 26 və 31 martda keçiriləcək. Pley-offda qalib tərəf növbəti mövsüm C Liqasında, məğlub D Liqasında mübarizə aparacaq.

Qeyd edək ki, İsveç – Azərbaycan oyunu Bakı vaxtı ilə saat 23:45-də başlayacaq.