UEFA Millətlər Liqasının Estoniya yığması ilə Qəbələdə keçirilən matçında zədələnərək 5-ci dəqiqədə əvəzlənən millimizin futbolçusu Rahil Məmmədovun durumuna aydınlıq gəlib.

Prosport.Az xəbər verir ki, millidə 21-ci matçına çıxan 28 yaşlı mərkəz müdafiəçisinin bud əzələsində kiçik yırtıq yaranıb. Bu çox da ciddi olmadığından, futbolçu tezliklə meydanlara qayıdacaq.

Ancaq Məmmədov 2 həftə meydanlarda olmayacaq. Bu isə o deməkdir ki, o, çıxış etdiyi Polşanın "Radomyak" komandasının "Stal" (24 noyabr) və "Motor"la (2 dekabr) oyunlarını buraxacaq. Onun yalnız "Katovitse" ilə matçda meydana dönəcəyi gözlənilir.

Rahil bu müddətdə Azərbaycan millisinin həkimlərinin nəzarətində reabilitasiyadan keçəcək. Təxminən 10 gündən sonra Polşadakı klubuna zədəsi ilə bağlı hesabat verməlidir. Bundan sonra Radom təmsilçisinin məşqçilər və tibbi heyəti onun sağlamlıq vəziyyətini qiymətləndirəcək. 

Bu müddətdə onun yerinə "Portu" və "Vorskla"nın sabiq braziliyalı yarımmüdafiəçisi Luizaunun mərkəz müdafiəçisi kimi oynayacağı ehtimal edilir. Çünki 26 yaşlı futbolçu daha əvvəl də stopper qismində çıxış təcrübəsinə malikdir. "İstanbul Başakşəhər"dən icarəyə götürülmüş çinli mərkəz müdafiəçisi U Şaotsun yeni sağaldığından, optimal fiziki formasından uzaqdır. "Radomyak"ın mərkəz müdafiəçilərindən Mateuş Çixotski də zədəsini sağaldır, braziliyalı kapitan Rafael Rossi isə zədəlidir.

Qeyd edək ki, Rahil Məmmədov dünən İsveçə gedən heyətdən çıxarılıb.