B Liqasına vəsiqəni təmin etmiş İsveç millisi UEFA Millətlər Liqasının VI turu çərçivəsində doğma meydanda Azərbaycanla oyundan öncə 2 əsas müdafiəçisini itirib.

Prosport.Az xəbər verir ki, bunlar İtaliyanın "Atalanta" və İngiltərənin "Mançester Yunayted" komandalarının mərkəz müdafiəçiləri – İsak Yen və Viktor Nilson Lindelöfdür.

Slovakiya ilə matçın 15-ci dəqiqəsində Burkina Faso əsilli İsak Yen növbəti sarı vərəqə alaraq cəzalı duruma düşüb. İsveç millisinin kapitanı olan Viktor Lindelöf isə 26-cı dəqiqədə qasıq nahiyəsindən zədə alaraq yerini Karl Starfeltə verib.

Bu səbəbdən də hər iki oyunçu Azərbaycanla oyunun heyətindən çıxarılıb. Onların yerinə "Seltik"ə (Şotlandiya) məxsus olan "Tvente"dən (Niderland) Qustaf Laqerbyelke və "Sirius"dan (İsveç ) Henrik Kasteqren yığmaya çağırılıb.

Xatırladaq ki, C Liqasında qalmağa çalışan Azərbaycan millisində də 2 müdafiəçi sıradan çıxıb. Polşanın "Radomyak" klubunda çıxış edən mərkəz müdafiəçisi Rahil Məmmədov Estoniya ilə oyunun 5-ci dəqiqəsində zədələnərək yerini Bəhlul Mustafazadəyə verib. "Qarabağ"ın cinah müdafiəçisi Elvin Cəfərquliyev isə 89-cu dəqiqədə şotlandiyalı hakim Con Biton tərəfindən sarı vərəqə almaqla cəzalı duruma düşüb. Ancaq onların yerinə heç kim düşərgəyə çağırılmayıb.

Qeyd edək ki, İsveç – Azərbaycan matçı sabah Bakı vaxtı ilə saat 23:45-də başlayacaq.