"Ötən il Azərbaycana qarşı oynayanda Bakıya gəlmək istəyirdim. Amma zədələndim. İndi bu matçı səbirsizliklə gözləyirəm. O zamanla bağlı çox yaxşı xatirələrim var”.

Prosport.Az xəbər verir ki, bunu Azərbaycanın Millətlər Liqasında rəqibi olan Estoniyanın futbolçusu Sergey Zenyov deyib.

İki mövsüm “Qəbələ”nin şərəfini qorumuş Zenyov üçün bu matç xüsusi əhəmiyyət daşıyır. 35 yaşlı futbolçu yenidən bu şəhərdə meydana çıxacaq. O, ölkəsinin Soccernet.ee saytına müsahibəsində Azərbaycanla bağlı xatirələrindən danışıb: “Avropa Liqasının oyunlarından yalnız 1-ni Qəbələ şəhər stadionunda keçirdik. Qalan matçlar Bakıda baş tutdu. Oyunun bu şəhərdə təşkilinə necə razılıq verdiklərini bilmirəm. Gözəl yerdir, amma ətrafda heç nə yoxdur. Mağazalar çox kiçikdir. Biz Bakıdan qayıdanda hər zaman 1 həftəlik bazarlığımızı edirdik. Paytaxtda məşqlər edib, oyunları Qəbələdə keçirirdik. Bu baxımdan da yolumuz çox çətin idi. Orda oynadığım zaman komanda yoldaşım olmuş azərbaycanlılarla ünsiyyətim yoxdur. Çünki dil baryerimiz vardı. Onların çoxu rus dilini bilmir. Bakıdan kənarda doğulanlar heç bilmirdi”.

Sergey Zenyov ölkəmizdə klublarla müqayisədə millidə inkişafın yüksək səviyyədə olmadığını da vurğulayıb: “Azərbaycanda hər zaman yığmanın uğursuzluğundan narahat idilər. Bu barədə tez-tez yazırdılar. Onlar da müxtəlif həll yollarını sınayır. Bir vaxtlar serbləri milliləşdirirdilər. İndi isə Avropanın müxtəlif ölkələrində nənə və ya babası azərbaycanlı olan oyunçuları tapmağa çalışırlar. Buna misal olaraq, Estoniyadan Azərbaycanın gənclər komandasına dəvət olunan Murad Vəliyevin adını çəkə bilərəm”.

Qeyd edək ki, Azərbaycan – Estoniya görüşü sabah saat 18:00-da başlayacaq.