“Əzmkar mübarizə aparacağıq ki, layiqli qələbə qazanaq. Bunun fərqindəyik”.
Prosport.Az xəbər verir ki, bu sözləri Azərbaycan millisinin futbolçusu Musa Qurbanlı deyib.
22 yaşlı hücumçu UEFA Millətlər Liqası çərçivəsində Estoniya ilə oyundan öncə mətbuat konfransında jurnalistlərin suallarını cavablandırıb.
- Hazırkı formanızı necə dəyərləndirirsiniz?
- Mövsümün əvvəlində zədələndim, əməliyyat olundum. Hələ təzə-təzə oynamağa başlamışam. Çalışıram ki, optimal formamı bərpa edim. Ondan sonra hər şey öz yerini tapacaq.
- Yeni baş məşqçi Fernandu Santuşun oyun fəlsəfəsi haqqında fikirləriniz necədir?
- Hər məşqçinin öz oyun fəlsəfəsi var. Fernandu Santuş böyük məşqçidir. Nailiyyətləri göz qabağındadır. Bu mənim onunla ilk təlim-məşq toplanışımdır. Biz oyunçular olaraq onun fəlsəfəsinə öyrəşməliyik. Onun dediklərini meydanda həyata keçirməliyik. Bu sinxron olduğu halda nəticələr yaxşılaşacaq.
- İsveçdə “Yurqorden” komandasında legioner həyatı yaşadınız. Həmin dönəmi necə qiymətləndirirsiniz?
- Çətin oldu. Mental olaraq asan deyildi. Mən də bunun fərqində idim. Bir gənc azərbaycanlı kimi Avropaya yollanmışdım. Özümün də özümdən gözləntilərim böyük idi. Ona görə də bir qədər çətin alındı. Amma çalışıram ki, müsbət tərəfə aparım. Futbolçunun həyatında çətinlik olmasa, nailiyyət olmaz. Bundan nəticə çıxarmağa çalışacağam. Fikirləşirəm ki, bu məni həvəsdən salmamalıdır. Hələ gəncəm. 22 yaşım var. Karyeramın əvvəlindəyəm. Mənim üçün yaxşı təcrübə idi. Çalışacağam ki, bundan dərs çıxarım.
- Estoniyanın heyətində bir sıra legioner futbolçular var. Rəqibi necə təhlil etmisiniz?
- Estoniyanın heyətində oynayan oyunçuları sırf bir-bir tanımıram. Harada oynadıqlarını bilmirəm. Bəlkə onlar da ölkə xaricində çıxış edirlər. Açığı, bu mənim üçün o qədər də maraqlı deyil. Bəzən olur ki, çox güclü komandalar zəiflərə məğlub olurlar. Mən məsələyə bu tərəfdən baxmıram. Fikirləşirəm ki, öz oyunumuza köklənsək, bunu yaxşılaşdırmağa çalışsaq, nəticə olacaq.
- Zədədən yeni qayıtdığınızı qeyd etdiniz. Bundan sonra belə qısa müddətdə milliyə dəvət olunacağınızı düşünürdünüz?
- Hər futbolçu millidə oynamağa can atır. Zədədən qayıtmışam, hələ matçlara çıxmamışam. Amma indi belə alındı. Hamımız milliyə maksimumuzu vermək üçün hazırıq.